John 19

UJesu Ugwetshelwa Ukubethelwa

1UPhilathu wasemthatha uJesu wathi katshaywe ngesaswebhu. 2Amabutho eluka umqhele wameva awubeka ekhanda lakhe. Bamgqokisa isigqoko esiyibubende 3baya kuye baphindaphinda bememeza besithi, “Bayethe, O Nkosi yabaJuda!”

4UPhilathu waphinda waphuma wathi kubaJuda, “Khangelani, sengimkhupha ngimlethe kini ngilazisa ukuthi kangifumani sizatho sokumethesa icala.” 5Kwathi uJesu ephuma ethwele umqhele wameva, egqoke isigqoko esiyibubende uPhilathu wathi kubo, “Yiboneni-ke, nansi indoda!”

6Abaphristi abakhulu lezikhulu zabo bonela ukumbona bamemeza bathi, “Mbethele! Mbethele!” Kodwa uPhilathu waphendula wathi, “Mthatheni limbethele lina. Mina, kangifumani sizatho sokumethesa icala.”

7AbaJuda baphikelela bathi, “Thina silomthetho, ngakho mayelana lalowomthetho kumele afe ngokuba uzithi uyiNdodana kaNkulunkulu.”

8UPhilathu wathi ekuzwa lokhu wesaba kakhulu,

9wasebuyela esigodlweni. Wabuza uJesu wathi, “Ungowangaphi wena?” kodwa uJesu kamphendulanga.

10UPhilathu wathi, “Uyala yini ukukhuluma lami? Awuboni yini ukuthi mina ngilamandla okukukhulula loba awokukubethela?”

11UJesu waphendula wathi, “Kawulawo amandla phezu kwami ongawaphiwanga evela phezulu. Ngakho-ke lowo onginikele kuwe ulecala lesono esikhulu okudlulayo.”

12Kusukela lapho uPhilathu wazama ukukhulula uJesu, kodwa abaJuda baqhubeka bememeza besithi, “Nxa uyekela umuntu lo ahambe, kawulabungane loKhesari. Lowo ozitshaya inkosi uphikisana loKhesari.”

13UPhilathu esezwe lokhu, wamletha phandle uJesu yena wasehlala esihlalweni sakhe sokwahlulela endaweni eyayithiwa isiGcawu Esigandelwe Ngamatshe (okuthiwa ngesiHebheru yiGabatha). 14Kwakulusuku lokuLungisela iViki yePhasika, ngehora lesithupha. UPhilathu wathi kubaJuda, “Nansi inkosi yenu.”

15Kodwa bamemeza bathi, “Msuse! Msuse! Mbethele!” UPhilathu wabuza wathi, “Ngibethele inkosi yenu na?” Abaphristi abakhulu bamphendula bathi, “Kasilankosi ngaphandle kukaKhesari.”

16Ekucineni uPhilathu wamnikela kubo ukuba abethelwe.

Ukubethelwa KukaJesu

Lapho-ke amabutho asemthatha uJesu.

17Wathwala isiphambano wasuka waya eNdaweni yoKhakhayi (okuthiwa ngesiHebheru yiGoligotha). 18Bambethela khona lapho kanye labanye ababili – ngapha langapha kwakhe, uJesu waba phakathi.

19UPhilathu waloba umbhalo wananyathiselwa esiphambanweni. Wawubhalwe ukuthi: UJESU WASE-NAZARETHA, INKOSI YABAJUDA. 20AbaJuda abanengi bawufunda umbhalo lowo, ngoba indawo lapho uJesu abethelwa khona yayiseduze ledolobho, umbhalo lowo ulotshwe ngesiHebheru, ngesiLathini langesiGiriki. 21Abaphristi abakhulu bamaJuda basola kuPhilathu bathi, “Ungalobi uthi ‘INkosi yabaJuda.” Kodwa ukuthi umuntu lo wayezibiza ngokuthi uyinkosi yabaJuda.”

22UPhilathu waphendula wathi, “Esengikulobile, sengikulobile.”

23Kwathi amabutho esembethele uJesu athatha izigqoko zakhe azaba izingxenye ezine, ezilingene amabutho ngalinye, kwasala isigqoko semzimbeni. Sona sasingelamthungo, salukiwe sonke kusukela phezulu kusiya phansi.

24Bacebisana bathi, “Kasingasidabuli. Kasikhetheni ngenkatho ukuthi sibe ngesikabani.” Lokhu kwenzakala ukuze kugcwaliseke umbhalo owathi, “Babelana izambatho zami benza inkatho ngezigqoko zami.”

Yikho lokhu amabutho akwenzayo.

25Eduze kwesiphambano sakhe uJesu kwakumi unina, udadewabo kanina, uMariya umkaKilopasi loMariya uMagadalena. 26UJesu wathi ebona unina lapho lomfundi ayemthanda emi lapho eduze, wathi kunina, “Mama, nansi indodana yakho,” 27wathi kumfundi, “Nangu unyoko.” Kusukela kulesosikhathi umfundi lowo wamthatha unina wamusa ekhaya lakhe.

Ukufa KukaJesu

28Ngemuva kwalesosikhathi uJesu esesazi ukuthi konke kwasekuphelele, njalo ukuze umbhalo ugcwaliseke, wathi, “Ngomile.”

29Kwakubekiwe khonapho uphiso lulewayini yeviniga, basebegxamuza kulo ilenjana balixhuma eluthini lwesihlahlana sehisophi balalamela balifikisa ezindebeni zikaJesu. 30Esenathile wathi, “Sekuphelile.” Esetsho lokho wagobisa ikhanda lakhe wafa.

31Lolo kwakulusuku lokuLungiselela, ngosuku olulandelayo kuzakuba yiSabatha eqakathekileyo. Ngokuba abaJuda babengafuni izidumbu zisale eziphambanweni ngeSabatha, bacela uPhilathu ukuthi kwephulwe amalunga emilenze lezidumbu zethulwe. 32Yikho amabutho eza ephula imilenze yendoda yokuqala eyayibethelwe loJesu, aphinda lakweyinye. 33Kodwa athi efika kuJesu ebona ukuthi wayevele esefile, kawasazephulanga izitho zakhe. 34Endaweni yalokho elinye ibutho lamciba uJesu ngomkhonto ohlangothini, kwantshaza igazi lamanzi. 35Umuntu owakubonayo usebulethile ubufakazi, njalo ubufakazi bakhe buliqiniso. Uyazi ukuthi ukhuluma iqiniso, yikho ufakazela ukuthi lani libe lokukholwa. 36Lezizinto zenzakala ukuze kugcwaliseke umbhalo othi: “Kalikho lalinye ithambo lakhe elizakwephulwa,”

37lomunye umbhalo uthi, “Bazakhangela kulowo abamgwazayo.”

Ukungcwatshwa KukaJesu

38Ngemuva kwalokho uJosefa wase-Arimathiya wacela kuPhilathu isidumbu sikaJesu. UJosefa lo wayengumfundi kaJesu, ekucatshisa ngokuba wayesesaba abaJuda. Eselemvumo kaPhilathu weza wasithatha isidumbu. 39Wayephathiswa nguNikhodemu, indoda leyana eyayike yeza kuJesu ebusuku. UNikhodemu weza lamakha emure lenhlaba. 40Bobabili bathatha isidumbu sikaJesu basigcoba ngalawomakha njalo basigoqela ngamaqhele elineni. Lokhu kwakungumkhuba wabaJuda owokungcwaba. 41Endaweni lapho uJesu abethelwa khona kwakulesivande, esivandeni kulethuna elitsha okwakungakaze kungcwatshwe muntu kulo. 42Ngenxa yokuthi kwakulusuku lokuLungiselela kubaJuda, njalo ngokuthi ithuna laliseduze, bamngcwaba khonapho uJesu.